O CiTIUS alcanza a excelencia

Dúas cátedras universidade-empresa (IA en Medicina Personalizada de Precisión e Deseño Microelectrónico); dous premios ao centro polo seu impacto e relevancia social (Premio SERenidade, Cadena SER, e Premio Especial CPEIG, Colexio de Enxeñeiros Informáticos de Galicia); e a responsabilidade e o privilexio de organizar o encontro científico máis importante de Europa no campo da Intelixencia Artificial (ECAI 2024), son só algúns dos éxitos máis recentes do CiTIUS (Centro Singular de Investigación en Tecnoloxías Intelixentes da USC).

A eles únese agora un novo, e de excepcional importancia: conseguir a máxima cualificación posible trala recente avaliación de calidade do centro, realizada por unha comisión de expertos designada pola Xunta de Galicia dentro da súa política de centros singulares de investigación do Sistema Universitario Galego. «Para entendermos, é como recibir un sobresaínte», aclara Senén Barro, director científico do CiTIUS. O máximo responsable do centro incide en que «isto ten unha enorme relevancia, dado o rigor co que somos avaliados e a súa repercusión no financiamento do centro», explica. 

Con este resultado, o CiTIUS sitúase na elite dos centros de investigación, xunto con outros tres centros: IGFAE, CiQUS e CiMUS (todos eles da Universidade de Santiago de Compostela, a única universidade galega que logrou unha “A” para os seus centros de investigación), de entre os dez centros de investigación que foron acreditados nesta nova convocatoria do goberno autonómico.

Referente de excelencia

O resultado da avaliación recibiuse con enorme satisfacción no centro, que celebrou «con orgullo» este novo recoñecemento ao labor desempeñado por todo o equipo no último período trianual. Tal e como recoñece Senén Barro, «ser parte da rede de centros singulares de investigación do Sistema Universitario Galego é unha gran responsabilidade e satisfacción individual e colectiva, pero alcanzar a excelencia dentro da devandita rede amplifícao todo». Barro ve tamén nesta nova cualificación un estímulo para seguir medrando: «estamos seguros de que non só reforza o noso papel como referente da investigación en Intelixencia Artificial de Galicia, senón que tamén nos revaloriza dentro do sistema de investigación español e europeo», afirma.

Pola súa banda, a directora adxunta do CITIUS, Paula López, quixo poñer en valor «a traxectoria do CiTIUS, que se suma así aos outros tres únicos centros cualificados como “A” tralo proceso de avaliación, todos eles da USC». 

«Un desempeño sobresaínte»

A avaliación externa ao CiTIUS asegura que o centro «demostrou un desempeño sobresaliente» na súa actividade e sinala, ademais, que «non só destaca pola súa solidez e balance entre visión e execución, senón tamén por unha estrutura organizativa e estándares de calidade, que o sitúan á vangarda no seu ámbito».

Máis especificamente, o equipo avaliador alude á propia organización do centro, sinalando que «en termos de organización e goberno, o CiTIUS caracterízase por unha estratexia dirixida cara ás Tecnoloxías Intelixentes, priorizando a excelencia e a calidade sobre a cantidade. Isto, xunto cunha estrutura que promove unha xestión do talento eficaz e decisións áxiles, configura ao CiTIUS como un centro ben organizado, cun claro enfoque cara a estándares de calidade elevados».

No que respecta á dimensión da calidade da investigación, as persoas responsábeis do informe salientan «as súas contribucións científicas de alto impacto» e a capacidade do centro para «atraer proxectos de investigación de relevancia». Tamén se deteñen na relevancia social do CiTIUS, valorando de forma moi positiva «a súa relación e esforzos co grao de IA, cuxos resultados mostran un enorme potencial como panca de cambio neste contexto». Neste sentido, o informe destaca tamén «a implementación de políticas éticas solidas en Intelixencia Artificial, e a expansión do impacto social e comunicativo do centro a nivel global» animándoo a continuar traballando na mesma liña.

O informe de avaliación conclúe que é relevante destacar que «o CiTIUS é un centro cuxo crecemento é altamente desexado e anticipado». Así mesmo, sinala tamén «a ambición do centro por consolidarse non só como un referente nacional en IA, senón tamén de proxectarse como un centro de referencia internacional». A Comisión Científica conclúe o seu informe convencida de que esa ambición «axudará a fortalecer aínda máis as súas capacidades en investigación, transferencia de coñecemento, e o seu posicionamento global, establecendo así un sólido marco para a expansión da súa influencia científica no campo da Intelixencia Artificial».