O CiTIUS celebra un ano máis o 11 de febreiro (Día Internacional da Muller e a Nena na Ciencia) recuperando o lema #SomosQuen, enmarcado na campaña 'Científicas Preto de TI'. Esta iniciativa , unha actividade de divulgación proposta como un xogo de palabras entre a segunda persoa do singular en galego ('ti') e o acrónimo da área de investigación principal do centro ('Tecnoloxías Intellxentes'), xurdiu orixinalmente hai exactamente un ano en forma de exposición itinerante: 5 paneis dobres nos que 9 investigadoras en distintas fases da carreira académica compartían a súa experiencia, con mensaxes dirixidas ao público feminino máis novo. Trala súa inauguración no Centro Comercial As Cancelas de Santiago de Compostela, a exposición iniciou unha viaxe de máis dun ano por distintos puntos de Galicia, servindo de inspiración a moitas nenas e mozas cuxo futuro profesional estaba aínda por decidir.
Ante o éxito da proposta en 2022 , o CiTIUS apostou por manter e reforzar en 2023 a esencia desta campaña, introducindo certos cambios de formato , pero mantendo a esencia e o espírito de divulgación que acompañaron a esta iniciativa na súa primeira edición.
Nesta ocasión, serán 5 as mulleres expertas en tecnoloxía as que se senten a conversar diante das cámaras para reflexionar sobre a súa traxectoria profesional. Os vídeos iranse facendo públicos ao longo da semana do 11F, e a través das súas palabras, o público poderá achegarse á persoa que habita trala investigación de vangarda...
Áreas como Informática, Enxeñería electrónica, Tecnoloxías da Linguaxe ou Deseño de microchips, pasarán a un segundo plano para ceder todo o protagonismo ás voces dun grupo de mulleres que, desde a súa experiencia vital e a súa situación profesional na actualidade, evocan as razóns esenciais que as levaron a converterse en científicas, animando a outras mulleres a non poñerse límites e a decidir por si mesmas en que desexan converterse. «Ser muller non é ningún impedimento» «Non pecharse portas». «Coñecer para decidir». Mesmo se iso supón -quen sabe- acabar traballando nun centro de investigación en Intelixencia artificial . As investigadoras do CiTIUS son o mellor exemplo diso.