Promovendo a aprendizaxe igualitaria da enxeñaría entre o alumnado máis cativo
O CiTIUS propón na semana do 11F un obradoiro de enxeñaría ‘para profes e peques’ de infantil e primeiros cursos de primaria, unha etapa formativa que non adoita estar incluída nos esforzos da comunidade investigadora por dar a coñecer as áreas máis técnicas.
Eva Cernadas, investigadora vinculada do CiTIUS, conducirá a nova proposta do centro para dar a coñecer a enxeñaría entre a audiencia máis nova na semana do 11F (Día Internacional da Muller e a Nena na Ciencia). A actividade, titulada 'O uso do xogo e a arte para educar na enxeñaría desde a infancia' consiste nun obradoiro online e asíncrono, dirixido ao alumnado de educación infantil e primeiros cursos de educación primaria. Nel relaciónanse aspectos da vida do público máis novo (tarefas, xogos cotiáns...) co mundo da enxeñaría, desde una visión igualitaria e sen utilizar, necesariamente, a tecnoloxía no proceso de aprendizaxe.
A idea deste obradoiro é dotar as persoas encargadas de exercer a docencia nestes niveis educativos de ferramentas pedagóxicas que poidan servir de axuda á hora de introducir na súa praxis diaria distintos conceptos relacionados co mundo da enxeñaría, polo xeral moi afastados das aulas ata idades máis avanzadas. «Non coñezo ningunha actividade dirixida ao alumnado de educación infantil e primeiros cursos de primaria», afirma a investigadora Eva Cernadas. «Porén, esta etapa é moi importante no fomento de novas vocacións, xa que a miúdo é o momento no que se empeza a perder o interese cara a ciencia en xeral, e a enxeñaría en particular».
«Aínda que resulte unha palabra descoñecida na máis tenra infancia, a enxeñaría vive con nós desde que nacemos», continúa a investigadora. «Con esta actividade, deseñada especificamente para un tramo de idade de entre 4 e 8 anos, pretendo que alumnado e profesorado de infantil tomen conciencia da cantidade de tarefas da vida cotiá, mesmo xogos, nos que estamos practicando a enxeñaría». «Queremos facelo tamén desde unha visión igualitaria, procurando que xogar a ser enxeñeira ou enxeñeiro sexa familiar e divertido», conclúe.
Os vídeos simulan a celebración dun obradoiro na aula, aínda que sen o retorno propio dunha interacción bidireccional. A experiencia e recursos pedagóxicos do profesorado completarán os obxectivos de aprendizaxe.
Entre os CEIP públicos de Galicia inscritos nos meses de febreiro e marzo sortearanse dúas xornadas de obradoiros presencias para tódolos niveis educativos nos centros premiados, que terán lugar en abril co gallo da 'Semana das Nenas nas TIC'.
Para participar nesta actividade, os centros deberán rexistrarse a través da páxina oficial do obradoiro.