Álvaro Ordóñez e Nicolás Vila gañan dous dos tres Premios Extraordinarios de Doutoramento en Enxeñaría

Nun recoñecemento á excelencia académica e científica acadada ao longo da súa tese, Álvaro Ordóñez e Nicolás Vila, investigadores posdoutorais colaboradores do Centro Singular de Investigación en Tecnoloxías Intelixentes (CiTIUS), recibiron este luns dous dos tres Premios Extraordinarios de Doutoramento 2021-2022 no campo da Enxeñaría, que concede anualmente a Universidade de Santiago de Compostela (USC). A cerimonia, celebrada na Aula Magna da Facultade de Psicoloxía, estivo presidida pola vicerreitora de Titulacións e Internacionalización da USC, María José López Couso, xunto coa secretaria xeral, Dulce María García Mella, e a secretaria da Escola Internacional de Doutoramento (EDIUS), María Isabel Neira Gómez.  

Os premios extraordinarios de doutoramento son un recoñecemento á investigación, esforzo e dedicación que hai detrás dun traballo académico -neste caso, unha tese doutoral-, e o seu obxectivo é dar pulo a unha notable traxectoria académica e profesional. A distinción outorgada a Ordóñez e Vila resalta o talento individual dos dous investigadores, e reforza o compromiso do CiTIUS coa formación de calidade, que contribúe ao avance do coñecemento e a innovación.  

Con este novo recoñecemento, a tese de Álvaro Ordóñez acumula tres distincións de calidade, tralo Premio á mellor tese do capítulo IEEE España de Xeociencia e Teledetección (2023), ou mesmo a distinción ‘Premio T3M’, recibida en 2022.  O traballo, titulado 'Efficient Registration of Multi and Hy. tral Remote Sensing Images on GPU', desenvolveuse baixo a dirección de Dora Blanco, investigadora vinculada do CiTIUS, e Francisco Argüello, expertos en computación en altas prestacións e teledetección. «A motivación deste estudo xurdiu da necesidade de desenvolver algoritmos capaces de procesar e aliñar automaticamente a gran cantidade de datos en imaxes multi e hiperespectrais capturados diariamente por satélites, como UAVs ou avións», explica Álvaro.  

Pola súa banda, Nicolás Vila recibiu tamén este premio ao seu traballo sobre a estimación automática da idade e a clasificación do sexo en radiografías panorámicas dentais. Un estudo ao que titulou 'Deep learning for chronological age and sex prediction from dental panoramic radiographs', e que contou coa dirección da investigadora vinculada do CiTIUS María José Carreira, así como de Inmaculada Tomás, investigadora colaboradora do centro. «Os sistemas propostos poden axudar a mellorar a precisión e a eficiencia de multitude de procedementos realizados actualmente no ámbito da medicina legal», afirma Nicolás. 

Os dous premios consolidan o liderado do CiTIUS no ámbito da investigación en enxeñaría, ao figurar por segundo ano consecutivo dous dos seus membros entre os tres premiados nesta categoría. Por outra banda, o destacado labor de ámbolos dous investigadores reafirma a súa dedicación e esforzo nas súas respectivas áreas de estudo, poñendo en valor así mesmo a capacidade do centro para fomentar o desenvolvemento de investigacións innovadoras e de alto impacto na comunidade científica. Álvaro Ordóñez e Nicolás Vila coinciden nas súas reflexións ao valorar que «sempre é gratificante que se recoñeza un traballo de varios anos de estudo», aludindo tamén aos seus directores e grupos de investigación ao sinalar que «este tipo de recoñecementos serven para poñer en valor o traballo de investigación realizado en grupo».