Noelia Gerbaudo Gonzalez

Investigadora colaboradora no proxecto XOGAMOS (CiTIUS, USC), financiado pola Axencia Estatal de Investigación (Consolidación Investigadora 2024, ref. CNS2024-154915; 2025-2027) e dedicado á mellora e sustentabilidade das terapias de estimulación cognitiva en persoas maiores mediante modelos de intelixencia artificial integrados nun robot social. Desde un enfoque centrado na persoa usuaria e nos principios de IA responsable, o proxecto aborda a fiabilidade dos modelos multimodais de pregunta-resposta e diálogo, mediante pipelines que verifican a coherencia e a adecuación do contido xerado antes do seu uso en actividades de estimulación cognitiva. Desde o meu perfil clínico, achego a perspectiva do coidado psicosocial ao deseño e á avaliación destas actividades dialóxicas.

Xestión de proxectos do Grupo de Investigación Cronicidade, Innovación Educativa e Tecnoloxías Aplicadas á Saúde (CroniEduTec; USC-IDIS). Contribúo ao desenvolvemento de modelos innovadores para a formación de equipos de saúde, a xeración de evidencia científica e a transferencia de coñecemento.

Doutoranda no Programa de Doutoramento en Desenvolvemento Psicolóxico, Aprendizaxe e Saúde da Universidade de Santiago de Compostela, baixo a dirección do Prof. Manuel Gandoy Crego. A miña investigación doutoral explora o potencial das tecnoloxías multimedia para mellorar a atención psicosocial de persoas con demencia, fortalecer a formación e as competencias dos profesionais da saúde e facilitar a implementación práctica de solucións innovadoras en contornos sociosanitarios.