Defensa de tese: 'Debuxando liñas dixitais: análise de patróns da retórica divisiva nas discusións das redes sociais'

Internet prometía ampliar o debate público e mellorar o razoamento colectivo. Dúas décadas despois, a discusión en liña aseméllase cada vez máis a un «bosque escuro», no que as voces moderadas se retiran e predominan os rexistros máis confrontativos. As explicacións dominantes —a radicalización algorítmica, a desinformación e as cámaras de eco— presentan as persoas usuarias como receptoras pasivas de forzas externas.

Esta tese recupera a capacidade de acción das persoas participantes ao entender a controversia en liña como un fenómeno retórico entre iguais. A partir da teoría da identidade social, aborda as discusións controvertidas como un traballo de construción identitaria mediante técnicas retóricas divisivas (DRT), integradas en ecosistemas retóricos configurados tanto polas plataformas como polas persoas usuarias.

Para poñer a proba esta proposta, a tese desenvolve un sistema computacional que combina modelos de linguaxe de gran tamaño e codificadores axustados, aplicado a comentarios e transcricións de YouTube sobre inmigración. Os resultados mostran que as DRT están asociadas á controversia e achegan información que non se reduce á postura nin á semántica. Tamén revelan que as audiencias se aliñan retoricamente coas fontes coas que interactúan e forman catro comunidades coherentes.

O traballo sitúase na intersección da filosofía, a lingüística computacional e as ciencias sociais, e realizouse no marco da rede Marie Skłodowska-Curie HYBRIDS.

Directores: Martín Pereira-Fariña e Renata Vieira